Второ контролно возење на малата патека АЗОТ 2018 мтб Предизвик

Изминатиов викенд направивме втора контролна тура низ падините на Мокра планина, поточно низ преубавите делови на АЗОТ-от.

   

Двете планирани патеки за велосипедскиот предизвик во Богомила за 4-от по ред Outdoor Festival #Азот2018мтбПредизвик се спремни, барем до овој момент. За малата во најголем дел. Еден сегмент има оштетувањаи тоа треба дополнително да се  доработи. Но тоа нема да биде проблем, напротив, тоа ке биде мотивација плус за сите нас кои сме дел од оваа организација.

   

Но да почнеме од почеток. Планот беше да ја извозиме малата патека, или – малиот маратон – како што си го викаме ние. Тргнување по стандардно време како на планираниот настан 09:45. Тргнуваме од дворот на ООУ Петар Поп Арсов и по асфалтниот пат се упатуваме кон Нежилово. На 3км од стартот е првиот знак кој го означува третиот сегмент на големата патека т.н. „Прилепски пат“. Оној што најголемиот дел на учесници по тешката делница се решаваат да го прескокнат и да возат право кон Богомила. Но не, не знаат дека баш тој дел е најубавиот. Нејсе, продолжуваме кон Нежилово, на 5-от км е првиот мал водопад, кој ако не го знаеш нема ни да го видиш. Затоа внимание, следете ги оние кои ја знаат патеката. Првата чешма е на 7км, на самиот влез на с.Нежилово. На 8,6км започнува искачувањето кон пл.дом Чеплес. Вкупна должина е 11км на оваа делница. Почетната точка кај Нежилово е 686мнв, а крајната на Чеплес е 1410мнв. Според она што го меревме, просечно искачување до пл.дом Чеплес е  некаде 150-170 минути или нешто повеќе од 2,5 часа. Секако ова е за оние кои немаат намера да брзаат и сакаат да ги фотографираат сите убавини кои ги има овој дел, вклучувајќи ги двата мали водопади, погледот од „милион долари“ каде солунска глава се исправува пред вас како огромен џин, чувството дека сте на 500 метри од изворот на реката Бабуна, како и многуте прекрасни погледи на преубавата природа.

    

Некаде пред 13:00 сме на Чеплес. Тука е предвидена поголема пауза, некаде 30-40 минути. Не поради друго, туку поради потребата од вдишување на беспрекорно чистиот воздух, на идеална чиста убавина… По оваа пауза, најголемиот дел на патеката е  удолнина, односно маките на велосипедистите се скоро готови. Но, не е така. На 21,6км од стартот, на 1365мнв природата овде ја покажала својата моќ. Огромна лавина си направила своја патека, не сметајки дека и ние велосипедистите сакаме свој пат. Но, без грижи, ние ќе го средиме овој проблем, а истовремено ова ке биде место каде ке биде посебна атракција каде, на крај од мај ке правиме снешко. Можеме се да правиме , не е проблем…

Подоле , на 1,5км од ова уште една природна убавина – Голем водопад кој ве остава без здив. Природата овде направила свое ремек дело, ние само треба да уживаме. Овде може да седите цел ден, секако ако немате намера да  стасате на време во Богомила за гравчето. Сепак, ние се спуштаме удоле, има делови каде  големи гранки се испречиле на среде патот, но тоа нема да биде проблем, тоа е планот за следната прошетка по оваа убавина.

      

Следна дестиниација е с.Папрадиште. На 26,7км од стартот, на висина од 985мнв, е едно од најбавите села во Македонија. Има многу што да се пишува за Папрадиште, но ова не е целта на овој запис. Целта е да се поттикне читателот, да дојде таму и самиот тој да продолжи со текстот….

По Папрадиште патеката е  целосно со асфалт, се до крајот, со вкупна должина од околу 9км. Внимателно треба да се вози овде, затоа што многуте кривини и нерамниот асфалт се голем проблем за неискусните велсоипедисти. Затоа, внимавајте, најважно е секој безбедно да стаса до целта. Здравјето пред се!

Тука е отприлика крајот на возењето. Но крајот на уживањето не може да се каже, затоа што едноставно не можеш да се решиш каде да го испиеш заслуженото пиво – кај газда Борис Трајковски во далеку познатата коперација, или во ресторанчето на Зидан Мост со најубавите колбаси на скара. Има решение, прво кај Борис, па во Зидан Мост, мора од се да се проба.

Крајното време на пристигнување, мерено според ова пробно возење е некаде  15:00 – 15:00 часот што е сосема доволно за просечен велосипедист. Значи, планирајте си време и а возење, и за одмарање, и за преубави фотографии. Има време за се.

Ваше е само да  си обезедете место на 4-от АЗОТ2018мтбПредизвик, се друго е наша обврска.

Се гледаме во Богомила на 25-26-27 мај!!!

   

   

   

 

766total visits,1visits today

You may also like...